اتكل ، زمر عالكوع ، عطي ضو ، هوينا : يعني حل عنا وفرقنا ، تركنا يعني .
أرصة مفلفلة : يعني هي الأرصة يلي بتجي ماكنة وبكون تدرج ألوانا عالجلد حمرا بعدين زرقا بعدين خضرا وبتضل شاهدة على العصر خخخخخ .
أشكرة ، أشكر خبر : يعني واضحة .
اصحك تنبرء ، حاج تطول وتقصر ، اصحا يطئلك شي عرء : يعني لأوي
آظااان : يعني الهيتر يا بعدي او السخاااان .
آكل كم : يعني آكل بحالو مقلب .
آلب عطّابة : يعني متوسخ آلب شحارة .
أنبز ، نبّأ : يعني تناوء خخخخ ال يعني شرحناها يعني مممممم تطلع بس مد راسو
بئّ : يعني كان عم يشرب مي وبء بقلب الكاسة يع عليه
باب لخم : يعني ما فهمو شي سطلو سطل
بالمشرمحي ، بالألم نشرح : يعني بالعربي الفصيح
البونات : مخصصات من الدولة للسكر والشاي والرز للمواطنين الآكلين هوا
التدع : يعني احترء من طرفو وهي للأكل والواعات .
تدندل : يعني طخى راسو من قرنة عالية
تمر تينة : ما بعرف بس بقولو لزق في متل التمر تينة معناتا شغلة بتلزق .
تنح عبدك يا ربي : هي لما يسكر مخو للواحد وغير ربك ما عاد يفهمو
حطة : هي الوجبة من الغسيل
حندء بندء : يعني عازك وعوازك .
خطاف الزعزع ، زعة : يعني بيجي عالسريع وبروح
خطرة : يعني مرة او بزماناتو .. هي لما الواحد يكون بدو يحكي سيرة
خطوف رجلك : يعني روح عالسريع ورجاع .
خطيّ : حرام
درخوشة ، زابوءة ، خلع : يعني حارة ديقة مكنكنة بس الخلع بيتميز انو سد .
رايح بالعبطة : يعني رايح بالعجقة مو مبين . ممممممم يعني كانو يكون في عجقة والكل عم يحكي تقوم انت تلحش شي مسبة عالماشي بتقوم بتروح بالعبطة ... المسبة طبعا مو انت
رايح بالعرض : يعني سمين ورايح بدنو كلو بخلفيتو
رايح نيفا : يعني خالص سلامتك
زرنئ : شرب المي من تم الواعة سواء كانت قنينة او غيرا بشرط ما يدق تمو فيا
سءّ : يعني تمسيح المي يلي بتنكب بخرئة ناشفة .
سرنوة : وحدة وشا ململم وسلالة من تحت لتحت .
سكبة : يعني شوية اكل من عند الجيران
سكملة : الطربيزة الزغيرة يلي بحطو عليا الضيافة من شاي وغيرو
سلحب : يعني زمط انسحب بهدوء
سنادة خاصرتو : يعني واحد وين ما راح بياخدو معو .
شمع الخيط ، فركا : يعني هرب
شوية لخر ، شوية رخر : يعني شوي تانية ( هي ميدانية دخيل رب الميدان انا هنن والفاظن المعتة خخخ )
شويط : هي الريحة يلي غالبا منشما لما تكون الام عم تطبخ وعم تحكي بالتلفون مع بنتا او اختا ..
طجونة ، ششنية ، تبنية : يعني واعة معدن زغيرة
طلع بالعالي : يعني عيط بصوت اعلا من صوت يلي عم يحكي معو
عاطس القرد بوشو : يعني مو رايء وعم يخانء دبان وشو
عاطسو من مناخيرو : يعني بيشبهو كتييييير
العجولي : ما بعرف بس شغلة حمرا لانو بقولو لما يكون الواحد بردان ومناخيرو حمر بقولو مناخيرو متل العجولي
عفارم عليك : يعني برافو عليك ( هي ميدانية ) حيو نحنا ^_^
على حيس رئّة : يعني شوي شوي سلحبة
عم ياكل بعقلو حلاوة : يعني عم يجدبا على سماه
عم يحفر كوسا : يعني عم ينكش بمناخيرو .
عملك موشة : يعني جولة .
غاسل ايدي منو : يعني قاطع الأمل منو
غرفة ماشية ، آيمة آعدة : يعني منكوت كرارا .
فئّر حناكك : يعني طق حنكك بايدي
فاينة : يعني الزاحلة او الشغلة المو تمام
فش نيعك : يعني حط ايدي جوات تمك لحتا ينملخ نيعك
لءوي تشد إيدك : يعني لا تعتمد عليه كتير
لاب : يعني دار
لابس وشو عالمألوب : يعني مو رايئ وما عم يتحاكا .
لألوء : يعني تبع .
مأرّح : يعني مو قليل .
مأطع موصل : يعني بيلعب على كل الحبال .
مدجون : يعني عالموضة بس مو بسنو
مدهرن : يعني عالموضة اكبر من سنو
مربع ، أوضة : غرفة الضيوف بالبيت العربي .
مفدوغ : مشقوق
النء : طلب الشغلة بشكل متكرر باوقات متقاربة يعني تعيف سماه للواحد ( أكيد النسوان بيعرفوا )
النبيرة ، الدنكورة : وهي دعبولة بتطلع براس الواحد بعد ما ياكلو شي طرءة على راسو .
نتع : حمل .
ندف ، لطش ، سفئ : يعني اخد سلبطة .
يرح رح : يعني شي في بسفلو مي .
يردح : يعيط ويندب .
يرغي : يحكي حكي بلا طعمة .
يكش ، يبيض ، يسحب ، يقشط : يعني يكزب ويحكي قصص ومفكر العالم مسدءة
يوك : جورة بالحيط بحطو فيا الفرش .
مع مراعات اللفظ يعني لازم تسمعا من واحد شامي ازا بدك تحفظا مزبوط .
والدعاوي من وحدة بكون احسن بس ما تكون عم تدعيهن عليك طبعا .
ومع مراعاة حركات الايدين عند الدعاوي .
ومع مراعاة انو في كلمات اخدت مجرا تاني عند الشوام وغيرو فيا شوي وصارت كلمات اصلية متل كلمة تخسيل بالخاء بدال تغسيل بالغين وهي صارت كلمة شامية
